Dating Delivery Boy Noon, Milyonaryo Na Ngayon

Tunay na isang kuwento ng pag-asa ang tagumpay ng isang “ampon” at dating delivery boy noon na milyonaryo na ngayon. Salamat sa masarap na r...

Tunay na isang kuwento ng pag-asa ang tagumpay ng isang “ampon” at dating delivery boy noon na milyonaryo na ngayon.

Salamat sa masarap na recipe ng kanyang special skinless longganisa at determinasyon, isa nang inspirasyon ngayon ang kwento ng buhay ni Manny Valencia, ang may-ari ng Joshua’s Meat Products.

Ang Simula

Hindi gaya ng ibang kuwento, medyo maalwan ang buhay nina Manny noong siya ay bata pa lamang. Tubong-Laguna si Manny at fruit vendor ang kanyang ama. Gayunman, nalulong sa sugal ang kanyang ama dahilan upang maubos ang lahat ng kanilang kita at puhunan sa negosyo. Bukod sa pagkalugi, nagkawatak-watak din ang kanilang pamilya.

Dahil sa pangyayaring ito, tila nawalan ng pag-asa si Manny dahil sa ginawa ng kanyang ama. Dito siya nagdesisyong tumira sa kanyang tiyahin sa loob ng sampung taon. Dito rin niya sinuportahan ang kanyang sarili sa pamamagitan ng pagiging part-time delivery boy habang nag-aaral.

Gunita ni Manny, “Medyo nagalit ako pero naintindihan ko din na mas mabuting doon na ako sa tiyahin ko kasi makakapag-aral ako kaysa nandoon kami sa amin. Tinanggap ko na din ang sitwasyon na kailangan namin maghiwa-hiwalay dahil sa hirap ng buhay.”

Ganunpaman, inamin ni Manny na mas naging maayos ang kanyang buhay matapos niyang mapatawad ang kanyang ama. Dito na rin nagsimula ang kanyang swerte.

Ang Pagdating Ng Swerte

Matapos ang 10 taong pamamalagi sa kanyang tiyahin, bumalik sa kanyang pamilya si Manny. Dahil walang trabaho ang ama, siya ang nagsilbing breadwinner ng kanilang pamilya. Kinalaunan, nakapagtrabaho si Manny sa isang kumpanya na nag-i-import ng mga processed meat products. Dito niya natutunan ang paghahanda ng skinless longganisa at iba pa.

Hindi nagtagal, nakapagpatayo si Manny ng sarili niyang kompanya kasama ang kanyang asawa. Itinatag nila ang Joshua’s Meat Products sa Naglarcan, Laguna noong 1933 na na nagsimula lamang sa paggawa ng skinless longganisa. Sa isang kakilalang meat supplier na yumao na nakuha ni Manny ang kanyang secret longganisa recipe.

Ngayon, kilala na ang Joshua’s Meat Products bilang isa sa mga kilalang supplier ng processed meat products hindi lamang sa Laguna kundi sa iba’t iba pang panig ng bansa.

Sikreto Ng Tagumpay

Nang tanungin kung ano ang sikreto ng kanyang tagumpay, ibinahagi ni Manny ang tatlong bagay: una ay ang pananalangin sa Diyos, pagiging tapat sa kapwa at ang pagkakaroon ng palabra de honor.

Dahil sa tatlong sikreto na ito ni Manny, napalago niya ang kanyang negosyo. Ngayon, hindi na lamang skinless longganisa ang kanilang produkto. Meron na rin silang pork bologna, ham, burger patties at tocino premium.

Isa lamang ang kuwento ni Manny sa mga kwento ng tagumpay ng maraming Pilipinong nagsikap, nagtiyaga at nagtiwala sa kanilang kakayahan. Gaya ni Manny, maaari mo ring maabot ang tagumpay sa pamamagitan ng pananalig, pagsisikap at pagtitiyaga. -- DAVE CALPITO